விளையாட்டு விடுதிகளில் சேர்க்கை: சென்னையில் 12இல் 3ஆம் கட்ட தேர்வு

தமிழகத்தில் உள்ள விளையாட்டு விடுதிகளில் சேருவதற்கான 3ஆம் கட்ட தேர்வு முகாம், சென்னையில் இம்மாதம் 12ஆம் தேதி நடைபெறுகிறது.

இது தொடர்பாக, திருநெல்வேலி மாவட்ட விளையாட்டு அலுவலர் க. சேவியர் ஜோதி சற்குணம் வெளியிட்ட செய்திக் குறிப்பு: தமிழ்நாடு விளையாட்டு மேம்பாடு மற்றும் இளைஞர் நலத் துறை மூலம் பள்ளி மாணவர் - மாணவிகளுக்கு விளையாட்டுத் துறையில் சாதனை படைக்க நல்ல பயிற்சி, தங்குமிட வசதி, சத்தான உணவுடன் கூடிய 28 விளையாட்டு விடுதிகள் செயல்படுத்தப்படுகின்றன.

இந்த விடுதிகளில் 2016-2017ஆம் ஆண்டுக்கான சேர்க்கை நடைபெறுகிறது. அதன்படி, விளையாட்டு விடுதிக்கான 3ஆம் கட்ட தேர்வுப் போட்டி சென்னையில் நடைபெறவுள்ளது. இதில், தேசிய அளவிலான போட்டிகளில் பதக்கம் வென்றோர், மாநில அளவிலான போட்டியில் முதல் 3 இடங்களில் பதக்கம் வென்றோர், தேசிய, மாநில அளவிலான போட்டிகளில் பங்கேற்றோர், தகுதி வாய்ந்த வீரர், வீராங்கனைகள் என்ற அடிப்படையில் பங்கேற்கலாம்.

7, 8, 9, 11ஆம் வகுப்பு மாணவர் - மாணவிகள் விளையாட்டு விடுதிகளிலும், கல்லூரி மாணவர்கள் சிறப்பு விளையாட்டு விடுதிகளிலும், 6, 7, 8ஆம் வகுப்பு மாணவர்கள் முதன்மை நிலை விளையாட்டு விடுதிகளிலும் சேரலாம்.

விளையாட்டு விடுதிகளுக்கான தேர்வுப் போட்டி: தடகளம், கூடைப்பந்து, பேட்மின்டன், குத்துச்சண்டை, கால்பந்து, கத்திச்சண்டை, ஜிம்னாஸ்டிக்ஸ், மேஜைப்பந்து, டென்னிஸ், ஜூடோ, கபடி, கைப்பந்து, கையுந்துப்பந்து, டேக்வாண்டோ, பளுதூக்குதல், வாள் சண்டை, நீச்சல், வளைகோல் பந்து.

சிறப்பு விளையாட்டு விடுதிகளுக்கான தேர்வுப் போட்டி: தடகளம், கூடைப்பந்து, குத்துச்சண்டை, கையுந்துப்பந்து, கால்பந்து, ஜூடோ.

முதன்மை நிலை விளையாட்டு விடுதிகளுக்கான தேர்வுப் போட்டி: தடகளம், பேட்மின்டன், குத்துச்சண்டை, ஜிம்னாஸ்டிக்ஸ், டென்னிஸ், நீச்சல், டேக்வாண்டோ.

3ஆம் கட்டத் தேர்வில் பங்கேற்போர் அதற்கான விண்ணப்பத்தை ‌w‌w‌w.‌s‌d​a‌t.‌t‌n.‌g‌o‌v.‌i‌n​  என்ற இணையதளத்தில் பதிவிறக்கம் செய்யலாம். பூர்த்தி செய்யப்பட்ட விண்ணப்பத்துடன், தேர்வு நாளான 12ஆம் தேதி காலை 8 மணிக்கு சென்னை ஜவாஹர்லால் நேரு விளையாட்டு அரங்கில் நேரில் ஆஜராக வேண்டும். தகுதி வாய்ந்தோருக்கு நேரடியாகத் தேர்வு நடத்தப்பட்டு, விளையாட்டு விடுதிகளில் சேர ஆணை வழங்கப்படும். மேலும், விவரங்களுக்கு 0462-2572632 என்ற தொலைபேசி எண்ணில் தொடர்பு கொள்ளலாம் என்றார் அவர்.